M'agradarie començar damb ua frase de Martin Luther King que ditz atau: "Se sabessa qu'eth mon s'acabe deman, jo, aué encara plantaria un arbe". Aguesta frase se hec en relacion a un sentiment, un sentiment d'espèr comun, er espèr d'abitar en un mon melhor. Non i a dubte qu'ei ena educacion a on es nòsti escolans traparàn era clau d'aguest espèr. Ua clau que, dilhèu, en moment en qué viuem actuaument, de crisi, ei era mès importanta, perque era educacion les ajudarà a dispausasr d'un pensament liure, innovador e critic, e a èster competenti en sòn trebalh diari.
Hè 40 ans, e damb era ajuda de fòrça familhes, es membres dera Fondacion Joan March, realizèren ua apòsta fòrça importanta entàs ciutadans dera Val d'Aran: era bastenda d'ua bastissa que supausèc era possibilitat de dispausar d'un institut, a on es mainatges e mainades dera Val podessen estudiar e educar-se pròp de casa, sense besonh de marchar deth territòri. eth procès istoric desboquèc en traspàs deth collègi Joan March ar Institut d'Aran, e es competéncies de gestion sigueren recuelhudes ena sua totalitat pera Generalitat de Catalonha. Per tant, e des de hè ara 25 ans, er Institut d'Aran a ua responsabilitat de cap as ciutadans que viuen ena Val, qu'ei agarrar aqueth testimòni d'un projècte iniciat pera pròpia poblacion, entà premanir es ciutadans deth sègle XXI.
Er espèr a de créisher entre nosati. E auem espèr, perque s'an realizat passi visibles e importanti pendent aguesti ans en mon educatiu en generau, en Centre en particular. Melhores qu'an supausat un benefici entara qualitat des estudiants. es mès evidentes son es òbres de reabilitacion der Institut, mès n'i a d'autes, dilhèu mès importantes, com eth trebalh desvolopat entà atier era diuersitat adequadament, en un mar de corresponsabilitat damb es institucions locaus, e sustot, era bastenda d'un Projècte Educatiu fondamentat enes signes identitaris dera Val d'Aran: era sua lengua e eth sòn entorn.
Pendent aguesti darrèri ans es persones que configuren era Comunitat Educativa der Institut d'Aran an hèt un trebalh fòrça important entà dessenhar aguest Projècte Educatiu, que mos a de procurar un encastre identitari e pròpri e que dongue satisfaccion as familhes. mos auem acalat en ua sèrie de programes educatius que son fòrça importanti entara poblacion, e que mos an d'amiar enquiara excelléncia educativa. ac afirmam des dera conviccion qu'èm en un bon camin de trebalh collaboratiu damb es familhes, es institucions, es professionaus e es pròpris escolans.
Auem espèr perque observam que, en dia a dia, es persones, a còps, des dera discrepància, mès damb illusion, compromís e dialòg, cerquen d'arténher un objectiu qu'ei comun e compartit: qu'es escolans, es nòsti hilhs, poguen víuer en un mon melhor, que siguen competenti entà desvolopar eth sòn prètzhèt, e que siguen premanidi entà bastir ua societat melhor.
Eth nòste objectiu non pòt pas èster un aute que balhar un servici, qu'ei un trèt basic e fondamentau entà quinsevolh ciutadan. Pr'amro d'açò, impulsam actuacions que cerquen era satisfaccion des ciutadans entà que tota era comunitat, tota era Val d'Aran se sente orgulhosa de çò qu'ara madeish ei eth sòn Institut.
ACTES COMMEMORATIUS DETH 25au ANIVERSARI DER INSTITUT D'ARAN:
Presentacion oficiau deth Lògo der Institut d'Aran e rotulacion ena façada deth Centre
Realizacion de pins commemoratius deth 25au. aniversari
Entre eth 2 e eth 13 de mai:
Hèsta entàs escolans der Institut amenizada damb musica
Concors de grafitis en pati der Institut. Tèmes: Lengua e Natura.
Dia 14 de mai: Hèsta institucionau commemorativa
Publicacion dera revista deth Centre "Tot de toti" damb tèma centrau dedicat ath 25au. aniversari
